Yn yr hanner can mlynedd cyn i’r Frenhines Fictoria ddod i’r orsedd, roedd newidiadau enfawr yn digwydd ym Mhrydain. Roedd llawer iawn o’r gwaith yr oedd pobl yn arfer ei wneud, bellach yn cael ei wneud mwy a mwy gan beriannau. Y ffordd fwyaf effeithlon o wneud hyn oedd i roi’r holl beiriannau mewn un adeilad a defnyddio pwer dwr neu ager i’w gweithio. Dyma oedd ffatri.
Yna byddai’n rhaid i’r ffatri gael ffyrdd da o gludo deunyddiau crai i’r ffatri ac i fynd â’r cynnyrch gorffenedig allan. Adeiladwyd ffyrdd, camlesi a thramffyrdd, ac yn ddiweddarach – rheilffyrdd i wneud hyn.

Yr enw a roddir ar yr holl newidiadau hyn yw’r Chwyldro Diwydiannol ac roedd angen llawer iawn o haearn. Cwm Tawe Uchaf oedd un o’r ardaloedd pwysicaf o ran cynhyrchu haearn ym Mhrydain ac am gyfnod dyma un o’r prif ardaloedd yn Ewrop am ddatblygiadau newydd yn y gwaith o gynhyrchu haearn.

Dewisiwch o’r ddewislen a welwch chi nesaf er mwyn gweld sut wnaeth cynhyrchu haearn ddatblygu yn yr ardal a sut effeithiodd ar yr ardal yn ystod cyfnod Fictoria.